新泉發潮州飯店

今晚一行六人去了旺角新泉發潮州飯店食晚飯，本來係去打邊爐或太子陵發食的，但最終都係選擇了這間，加上食完晚飯方 便老婆舅父去百老匯買野，好彩去到剛剛有位，但張檯極之細，無法啦只好分段點菜 ，因放兩三碟菜就已經無位了，樓上又滿座喎，我們點了豬紅拼蘿蔔、蘿蔔、大腸拼墨魚、咸酸菜、炸蠔餅、大眼雞、鹵水鵝件、椒絲腐乳通菜、吊片蠔仔粥、啤酒兩樽、汽水三支，埋單$530，嗚謝老婆舅父請食飯.

豬紅拼蘿蔔:豬紅都算幾入味，過得去啦

蘿蔔:反而蘿蔔又甜又無渣，味道小許辣辣地更醒神，所以追加多碟

咸酸菜:我們唔要鱔魚，只要齋咸酸菜，最鐘意切得夠大塊，加上這間的咸酸菜好爽脆架，食起黎都特別過癮，超滿足啊

炸蠔餅:雖然係炸的，但竟然唔太油膩，炸得又夠爽，裡面的蠔仔好鮮啊

大眼雞:估唔到條大眼雞會咁大條的，比平時食開的大很多，睇下隻眼睛位置就知啦，真係啖啖肉架

大腸拼墨魚:大腸清理得非常乾淨，但又無流失應有的味道，連平時唔食大腸的AMY姐都忍唔住要食返件，墨魚都ok啦，起碼唔會韌的

鹵水鵝件:下裝唔係我們要求的，但見幾檯都係咁，鵝肉都幾香，肉質又唔粗糙，這價錢黎講算超值的

椒絲腐乳通菜:通菜又嫩又脆，炒得很好

吊片蠔仔粥:加了吊片的粥底特別鮮甜的，同埋大量新鮮的蠔仔入去，點會唔好味呢？