老三火鍋(PART2)

今晚一行四人去左深水埗老三火鍋打邊爐, 之前都食過一次覺得幾好, 所以今次再來幫襯, 我們選左葯材醉雞湯底, 其他材料就有: 本地手切肥牛, 安格斯肥牛, 豬面青, 黃沙豬潤, 招牌餃, 稻庭烏冬麵X3, 蘿蔔, 蟹子墨魚滑拼蟹子鮮蝦滑, 椰菜拼韮菜餃, 什菜拼盤, 自製涼茶X2, 埋單$608元, 沒有加一服務費, 同要讚賞一下呢到的伙計服務好好, 呢餐食得非常滿意。

\ 葯材醉雞湯底:湯底好香葯材味,應該係新鮮雞,有成半隻,雞肉好嫰滑及好有雞味, 雞皮又薄又小肥膏,絕對不似蔗渣雞。

本地手切肥牛: 牛肉好有牛味,肉質都幾滑,但千萬不要烚得太耐, 如果唔係就會韌。

安格斯肥牛: 牛肉好雪花及新鮮, 雖然牛味比較淡,但就好重油份,好腍。

豬面青:肉質點烚都唔會韌, 非常有口感。

黃沙豬潤: 豬潤極新鮮,食得出本身的鮮甜味,完全冇異味, 可以話吃過最好的。

招牌餃: 餃子雖然細細粒, 但材料配合得好好, 因為有木耳令口感好豐富, 加上蔥花好香, 正呀!!!

稻庭烏冬: 老婆的最愛必食之選, 呢到的烏冬又滑又彈牙。

蘿蔔: 蘿蔔略唔夠甜, 但沒有渣囉...

蟹子墨魚滑拼蟹子鮮蝦滑: 兩者都一樣咁新鮮及爽口, 特別係蝦滑, 可能蝦本身味道重些, 如果係蝦丸應該會更好味。

椰菜餃: 椰菜唔夠多, 所以食唔出d咩特別味道, 因為餃子都比較細粒。

韮菜餃: 如果餃子再大一點會更好, 餡料雖然有韮菜味, 但總覺得到喉唔到肺... 

什菜拼盤: 有皇帝菜, 生菜, 唐萵, 全部都好新鮮....

自家製涼茶: 應該係夏枯草, 不太甜剛剛好,又夠凍,打邊爐啱哂....